حوزہ نیوز ایجنسی کی رپورٹ کے مطابق، مجلس وحدت مسلمین پاکستان کے امور خارجہ کے سیکرٹری علامہ ڈاکٹر سید شفقت حسین شیرازی نے غاصب اسرائیل کی جارحیت پر اپنے مذمتی بیان میں کہا ہے کہ اسلامی جمہوری ایران پر فلسطین کی غاصب صیہونی ریاست کی بزدلانہ جارحیت اس کے جنگی جنون کا منہ بولتا ثبوت ہے۔
انہوں نے مزید کہا کہ غاصب اسرائیل کہ جس کے ہاتھ فلسطینی، لبنانی ویمنی و شامی و دیگر عوام کے خون سے رنگے ہوئے ہیں۔ یہ ریاست اب مشرق وسطیٰ ہی نہیں، بلکہ دنیا کے لیے سکیورٹی رسک بن چکی ہے۔ حال میں ہونے والی اسرائیلی جارحیت عالمی قوانین کی کھلم کھلا خلاف ورزی ہے۔
علامہ شفقت شیرازی نے کہا کہ اسرائیلی جارحیت کے پیچھے شیطان بزرگ امریکہ کا مکمل کردار ہے اور اس جارحیت میں امریکہ برابر کا شریک ہے۔
انہوں نے مزید کہا کہ ہم اسرائیلی و امریکی کھلی جارحیت کی بھرپور مزمت کرتے ہیں اور اسلامی جمہوریہ ایران کو مکمل حق ہے کہ وہ اسرائیلی جارحیت کا منہ توڑ جواب دے۔ ہماری ہر قسم کی حمایت ملت ایران کے ساتھ ہے۔
انہوں نے عالم اسلام سے مخاطب ہو کر کہا کہ ہم تمام عالم اسلام سے مطالبہ کرتے ہیں کہ وہ غاصب اسرائیل کی کھلی جارحیت کے خلاف عملی اقدامات کریں اور سفارتی، اخلاقی اور عسکری سطح پر برادر اسلامی ملک ایران کی حمایت کی جائے۔
علامہ شفقت شیرازی نے کہا کہ غاصب اسرائیلی جارحیت سے شہید ہونے والی ایرانی فوجی قیادت و ایٹمی سائنسدانوں و عوام الناس کی شہادتوں پر ولی امر مسلمین حضرت ایت اللہ العظمٰی امام سید علی خامنہ ای و خانوادہ شہداء اور ایرانی غیور عوام کی خدمت ہدیہ تسلیت و تعزیت پیش کرتے ہیں اور ان حملوں میں زخمی ہونے والے عوام کی شفایابی کے لیے دعا گو ہیں۔
آپ کا تبصرہ